ரகசியங்களின் ரகசியம் இவள் !

 சிறு விஷயமோ 

பெரு விஷயமோ,

கண்சிமிட்டி கை மறைத்து

இவள் காதில் வந்து சொல்லிடுவாள் !

அவள் ரகசியமாய் சொல்லும் 

ரகசியங்களை ரசித்து கேட்கும் 

ரசிகை இவள் !

அவள் சிரித்துச் சொல்லும்

சின்ன சங்கதியில்

அலாதியான அழகிருக்கும் !

அகிலமே இவளுக்குள்

 ஆசைதீர ஆர்ப்பரிக்கும் !

விளங்கினாலும் வேண்டுமென்றே - இவள்

விளக்கம் கேட்டு வினவிடுவாள் !

சட்டென சிரித்திடுவாள்,

விழியசைவில் விளக்கிடுவாள் !

அப்படியா என்று இவளும்,

ஆமாம் என்று அவளும்,

கண்ணசைத்து காதோரம் 

கதை பேசும் கிசுகிசுக்கள் !

அவர்களுக்குள் 

அப்படி என்ன ரகசியமோ?

ஆச்சரியங்கள் அதிசயிக்கும்

அவளின் எண்ணங்களில் எழுகின்ற

ரகசியங்களின் ரகசியம் இவள் !!

                               -  மே. இசக்கிமுத்து

உன் பிரிவு என்ன செய்திடும்?

உன் பிரிவு என்ன செய்திடும்?

நீரில் விழுந்த எறும்பாய்
நிதமும் தத்தளித்தே தவித்து நிற்கும் !
நீந்தி வர நினைத்தாலும் 
மனமெங்கும் மனஸ்தாபம் மல்லுக்கட்டும் !

உன் பிரிவு என்ன செய்திடும்?

பேசிய வார்த்தைகளை ஒவ்வொன்றாய் 
யோசிக்க தூண்டும்!
பழகிய நாட்களெல்லாம் 
சிந்தையில் பரிதவிக்கும் !

உன் பிரிவு என்ன செய்திடும்?

 பசியுணர்வை மறக்கச் செய்யும்,
தூங்கும் நேரம் சுருங்கிச் செல்லும் !
நடுநிசியில் விழிக்கச் செய்து
விடியல் வரை விசும்பச் செய்யும் !

உன் பிரிவு என்ன செய்திடும்?
காணும் யாவையும் 

கனவெனவே கருதச் செய்யும்,
கனவென வந்ததையெல்லாம
நிஜமென  நினைக்கத் தோன்றும் !

உன் பிரிவு என்ன செய்திடும்?

தொலைவில் கேட்கும் பாடல்களில்
தொலைத்தவை எல்லாம் காற்றாய் வந்து,
உலையில் கொதிக்கும் நீராய்,
நினைவில் உயிரை தகிக்கும் !

உன் பிரிவு என்ன செய்திடும்?

காரணமின்றி கோபம் வரும்,
தன்னை தானே வெறுக்கத் தோன்றும் !

ஏன் இந்த பிரிவென்று
ஏக்கங்கள் சேர்ந்து கொண்டு,
எள்ளி நகையாடும் !

உன் பிரிவு என்ன செய்திடும்?

உண்மை பிரியத்தை, 

உறவின் உன்னதத்தை,
மௌனமாய் உணர்ந்திட செய்யும் !

கோபம் கொஞ்சம் தணிந்தபோது,

தனிமை எங்கும் நிறைந்திருக்கும் !
சேர்ந்திட மனமும் ஏங்கித் தவிக்கும்,
இதயமும் இதைத் தான் துடித்துச் சொல்லும் !!

                          -  மே. இசக்கிமுத்து

தூங்க வைத்த கதைகள் !!

நிலவில்லா நேரங்களில் 

நிசப்தமாக நகரும் அந்த கதைகள் !

மாயாஜால காட்சிகள் 

மனத்திரையில் வந்து செல்லும்,

மறு நொடியே மாயமென மறைந்து கொள்ளும் !

காற்றில் அசையும் தென்ங்கீற்றில்

கரிய உருவம் கையசைக்கும்!

பனை மரத்தின் காவோலை

படபடவென கைதட்டும்,

பயத்தோடு கதையும் பாதியில் நிற்கும் !

அப்பாவை அணைத்துக் கொண்டு 

அப்படியே தூக்கம் வரும்!

ஆனாலும்,

கதைகளின் நீட்சி 

கனவிலும் தொடர்ந்து வரும் !

இறக்கை முளைத்த ஒற்றை குதிரையில் 

இளவரசியை தேடி,

மலை தாண்டி, ஏழு கடல் தாண்டி,

மாவீரனின் சாகச கதைகள் !

அரசனின் சேனைகளும்,

அரண்மனை கோபுரங்களும்,

அரங்கேற்ற மண்டபமும்,

அப்பா சொல்ல சொல்ல,

அத்தனையும் வானில் 

நட்சத்திரங்களின் நடுவே,

அற்புதமாய் காட்சி தரும் !

தாத்தா அப்பாவிற்கும்,

பாட்டி அம்மாவிற்கும்,

அதன்பின் அப்பா எனக்கும்,

அக்கறையாய் அன்போடு,

வழி வழியாய் சொல்லி வந்த

வாய்மொழி கதைகள் !

அப்பா சொன்ன கதைகளை

நான் பிள்ளைகளுக்கு 

சொல்லும் போது,

கயிற்றுக் கட்டிலின் கதகதப்பும்,

முழு நிலா உலாவும் வான வீதியும்,

அப்பாவின் ஸ்பரிசமும்,

மனமெங்கும் நிறைந்து 

மெய்சிலிர்க்க வைத்துவிடும் !

இப்போது கூட,

தூக்கமில்லா இரவுகளில் - என் 

தலை கோதி தாலாட்டி,

தூங்க வைக்கும் கதைகள் அது !!

                             -  மே. இசக்கிமுத்து