'ம்ம்'மென்ற மந்திரம் !!

முடிவெடுக்க முடியாமல் 

யோசிக்கும் போதெல்லாம்

முந்திக்கொண்டு வருவது 'ம்ம்' !

ஆசையோடு வரும்

அழகான விண்ணப்பத்திற்கும் 'ம்ம்' !

ஆமோதிப்பா இல்லை இது

அலைக்கழிப்பா?

குதூகலமாய் குழப்பிவிடும் 'ம்ம்' !

அழுப்பால் அமைதியாய்

அயர்ந்திருக்கும் போது

அலைபேசியில் அழைத்திடும்

அன்பான நட்பிற்கு

ஆனந்தமாய் 'ம்ம்' !

கடற்கரை மணலில்

கைகோர்த்து நடக்கும்

காதலர்களின் காந்த வார்த்தை 'ம்ம்' !

அவ்வப்போது

அவள் சொல்லும் 'ம்ம்'மென்ற

அழகில் அகிலம் மறந்து

அதிசயித்து அவனும் சொல்வான் 'ம்ம்' !

திருமணம் முடிந்து

திங்கள் ஐந்து ஆனபின்பு

ஆசையாய் அழைத்திடும் போது

அலுப்பாய் நீண்டதொரு 'ம்ம்' !

ஏழுகடல் தாண்டி

இளவரசியை மீட்க செல்லும்

இளவலின் இரவு நேர கதைகளுக்கு

குழந்தைகளின் குதூகலமாய் 'ம்ம்' !

அவசர வேளையில்

அழையா விருந்தாளி சொல்லும்

அடுத்த வீட்டு கதைகளுக்கு

நமக்கேன் வம்பென்று

நழுவும் வார்த்தையாய் 'ம்ம்' !

ஆசைகளும் கனவுகளும்

ஆர்பரித்த உள்ளத்தில்

அடுக்கடுக்காய் சோதனைகள்

அதிரும்படி வந்த போது

எனக்கு மட்டும் ஏனென்று

ஏக்க பெருமூச்சாய் ம்ம்' !

கோப புயலில் உதிர்ந்த வார்த்தைகள்

மௌனமாய் நீர்த்து நிற்கும்,

தென்றலாய் மீண்டும் வருடுவது எந்நாளோ?

ஏக்கத்தில் மேலோங்கும் 'ம்ம்' !

அகராதியில் இல்லாதது 'ம்ம்' ,

அழகான உச்சரிப்பில் சொல்லானது!

வார்த்தைகள் ஏதும் இல்லாதபோது

வசியம் செய்திடும் 'மம்' !

'ம்ம்'மென்பது தந்திரமல்ல,

மனதார சொல்லிப் பாருங்கள்

மயக்கும் மந்திரம் அது !!

                       

                          மே. இசக்கிமுத்து 

நினைவெல்லாம் நட்பு!

சிறு புன்னகையில் தொடங்கி

சில்லென்று தென்றலாய்

சிந்தையில் வருடிச் செல்லும்!

நிலவொளி நேரத்தில் நம்

நினைவுகளில் நீண்டுச் செல்லும் !

கனவுகளில் கண்மூடி

கவலைகளை மறக்க செய்யும்!

துவண்டு நிற்கும் போதெல்லாம்

ஆறுதல் சொல்லி

அரவணைக்கும் தாய்மடி!

கள்ளமில்லா உள்ளமது

கலங்கம் சொல்லா எண்ணமது!

கனீரென சிரிப்பொலியில் 

கவலை மறந்த புன்னகை!

"ம்ம்" என்று வந்துவிட்டால்

எல்லாம் அதிலடங்கும்!!

கிடைக்கும் நேரத்தில்

நீண்டதொரு உரையாடல்,

பின்னே தொடர்ந்து வரும் குறுஞ்செய்தி!

நிறம் பார்த்து வந்ததல்ல,

மனம் பார்த்து, நல் புரிதல் கொண்டு,

நம்பிக்கை வைத்து மலர்ந்தது தான் 

நம் நட்பு!!

வசந்த காலத்தில்

வட்டமிடும் வண்ணத்துப் பூச்சியாய்,

மலர் மேல் வந்தமரும்

மார்கழி பனியாய்,

சாளரம் வழியே

சாரல் மழையை ரசித்திடும் மனதாய்,

மண் கொதிக்கும் வெயிலில்

மரத்தின் நிழலாய்,

ஆழ்மனதில் அழகிய உணர்வாய்

அமைந்ததே நம் நட்பு!!

 - மே. இசக்கிமுத்து

இனி வழியெங்கும் வலியில்லை!

சுடுஞ்சொல் வலி

சுருக்கென உள்ளிருந்து

கண்ணில் விழுந்த துாசியாய்

கையில் பட்ட காயமாய்

ஓயாமல் உறுத்தியது,

உள்ளிருந்து கலங்கிடவா

உதறிவிட்டு உறங்கிடவா?

தவறெங்கு உள்ளதென்று

தனித்திருந்து யோசித்தால்,

தவறேதும் செய்யாமல்

தலை குனிந்து நின்றபடி,

அலையடித்த மணல் போல

அங்கும்மிங்கும் உருண்டதிங்கே!

பாசமுள்ள மனசு மட்டும்

பாதி வழி வந்து வந்து

பரிதவித்து நின்றதிங்கே!

கூர்வேல் சொற்களால்

காயம் பட்ட உள்ளத்தில்

மருந்திட்டு மறந்தாலும்

வடுவாகி விட்டதானால்

பார்க்கும் போதெல்லாம்

பதறி துடித்ததிங்கே!

நேற்று ஒன்று தோன்றியது,

நெடுந்தூர பயணமிது

நெருஞ்சி முள் குத்தியதால்

நிலை குலைந்து நில்லாமல்,

போகும் வழியெங்கும் 

பூத்து நிற்கும் மலர்களோடு

பூரித்து கொண்டாடும் 

வாழ்வே போதும்!

இனி வழியெங்கும் வலியில்லை!

                         - மே.இசக்கிமுத்து