முற்றம் கொண்ட வீடு வேண்டும்..

முற்றத்தில் பாய் விரித்து
முதலில் வந்து படுத்திருப்பாய்,
கால் மேலே கால் போட்டு
கையிரண்டை தலையில் வைத்து
நிலவு என்னை அழைத்திடுவாய்!

அன்றாட நிகழ்வுகளை
அலுப்புடனே சொல்லிடுவாய்
சரியா தவறா என்று நான்
யோசிக்கும் முன்பே - நீ
சரியென்றும் அது தவறென்றும்
தலையாட்டி சொல்லிடுவாய்!

ஏதேதோ வார்த்தைகளை
ஏற்ற இறக்கத்தோடு
எப்படியிருக்கு இது
அருமை அருமையென
ஆனந்த சிரிப்பொலி!

கவிதையென காகிதத்தில்
கருப்பு மையால் எழுதுமுன்னே - நீ
கழித்து போட்ட வார்த்தைகளை
கவனமாய் சேகரிப்பேன்
இன்னொரு கவிதை!

நீ முணுமுணுத்த
பாடல் வரிகளையெல்லாம்
பள்ளி பிள்ளையாய்
பாடி திரிகிறேன் நான்!

இப்போதெல்லாம்,
நீ எங்கெங்கு சென்றாலும்
தொடர்கிறேன் நான்,
முன்பு போல பேச வேண்டும்,
முற்றம் கொண்ட வீடு வேண்டும்!

                                                   -மே.இசக்கிமுத்து